vulesse

Vulesse vencere pe’ tte
pe’ te levà ‘stu gelo ca se fatto ‘a casa
dint’a l’uocchie tuoje;
vulesse vencere pe’ tte
ca staje ‘a piezzo ma nun t’arrienno
‘e comme ‘na criatura t’arruobbe ‘e mumento;
vulesse vencere pe’ tte
alcova ‘a mezzanotte ‘e ciardino ‘a primma matina;
vulesse vencere pe’ tte
ca tiene sempe ‘e vetro d’ ‘e feneste rutto, pure ‘a gennaio;
vulesse vencere pe’ tte ca viene d’ ‘a polonia,
addò tutto è fernuto,
addò tutto ritorna è accumence d’ ‘o capo;
vulesse vencere pe’ tte ca tiene l’africa int’e vene
‘e nu piezzo ‘e gomma miez’e cosce;
vulesse vencere pe’ tte ca primma t’hanno sfravecato ‘a casa
‘e doppo futtuto cu ‘e parole;
vulesse vencere pe’ tte
pe’ truccà ‘e carte ‘e spaventà ‘o cielo;
vulesse vencere pe’ tte
ca tiene ‘a grazia dint’e mane ‘e nu buco dint’o stommàco;
vulesse vencere pe’ tte
ca nun faje domande pecché già canusce ‘e risposte;
vulesse vencere pe’ tte
ca te staje meno ‘e nu surze ‘e birra
‘e cchiù ‘e nu surriso annascuse areto ‘a nu starnute;
vulesse vencere pe’ tte
pe’ sunà nu blues overo ‘e ballà ‘ncopp’e nurghe ‘e l’anema pe’ chi nun sape,
nun po’,
nun vo’ cchiù sunnà;
vulesse vencere pe’ tte
pe’ passà cu ‘o russo pure sì ‘nterra ‘sta ancora tutt’nfuso;
vulesse vencere pe’ tte
pe’ nun ‘sta ‘nàta jurnata fuso.